1 de xaneiro

Aninovo

En xaneiro, sete lobos polo carreiro.
~ ~ ~ ~ ~
En moitas partes de Galicia crese que os primeiros días do ano indican como será o resto do ano. As sortes son os primeiros doce días do mes de xaneiro e prognostican que vai acontecer durante cada mes do ano. Así, o tempo que fai o día 1 será o tempo que fará en xaneiro, o do día 2 corresponderá a febreiro, etc. As resortes son os doce días seguintes, do 13 ó 24, e serven para ratificar ou contradicir ó prognóstico que anunciaron as sortes. Hai quen di que hai que fiarse máis do que din as resortes.
~ ~ ~ ~ ~
A lúa de xaneiro, chamada lúa morta, é a mellor para matalo porco. A lúa crecente seguinte será a adecuada para salgalo se se quere que medre a carne na artesa. Nunca debe matarse con lúa chea porque o touciño se aluaría. Do mesmo xeito, durante a lúa morta de xaneiro non se deben poda-las viñas.
~ ~ ~ ~ ~

46 a. C.: comeza a funcionar o calendario iuliano.

1818: Mary Shelley publica a súa novela Frankenstein, ou o Prometeo moderno.
1820: O tenente coronel Rafael del Riego érguese contra o absolutismo nas Cabezas de San Juán, (Sevilla), e proclama a Constitución de 1812.
1863: Nace Pierre de Coubertin, pedagogo e historiador francés, promotor dos Xogos Olímpicos da era moderna.
1867: o químico sueco Alfred Nobel obtén por primeira vez dinamita de maneira industrial.
1892: Ábrese Ellis Island, o máis famoso centro de inmigración dos Estados Unidos.
1899: O exército español entrega a illa de Cuba a Estados Unidos, que asumiu o seu goberno durante tres anos.
1916: Sae a revista mensual Suevia en Buenos Aires. Os contidos eran noticias galegas con críticas á situación social do país.
1944: Franco négase a recoñecer a república fascista de Salò, constituída por Mussolini.
1959: En Cuba triunfa a rebelión socialista. O ditador Fulgencio Batista refuxiase nos Estados Unidos.
1996: Primeiro Torneo de Aninovo de Xadrez, xerme das Xornadas Lúdicas de Nadal de Palaestra.
~ ~ ~ ~ ~